कृषि पर्यटनात अमेरिकेतील महिलेची भरारी

जेन एकेर्ट यांच्या कृषि पर्यटन केंद्राला प्रति वर्ष पाच लाख पर्यंटक देतात भेट

अनेक उच्च शिक्षीत लोक शेतीमध्ये उतरत आहेत. त्यांच्या बरोबर त्यांचा त्यांच्या क्षेत्रातील अनुभवही शेतीमध्ये येत आहे. आपल्या मार्केटींगच्या कौशल्यावर एक महिलेने सुरू केलेल्या कृषि पर्यटन केंद्राला प्रती वर्ष पाच लाख पर्यटक भेट देतात. पर्यटकांना त्यांच्या धावपळीच्या आयुष्यात शेतीच्या, निसर्गाच्या सान्निध्यात येण्याची ओढ असते. त्या ओढीला विक्री कौशल्यातून व्यवसायाचे रुप देणाऱ्या अमेरिकेतील महिलेच्या कर्तूत्वातून महाराष्ट्रातील कृषि पर्यटनाला प्रेरणा मिळेल. 

शेतीमध्ये वर्षाच्या श्रमावर विपरित हवामानामुळे पाणी फेरलेलं पाहत मोठ्या झालेल्या जेन एकेर्ट यांनी व्यावसायिक पदवी मिळवल्यानंतर नोकरीच्या निमित्ताने घर सोडले. मात्र त्यांच्या कुटूंबाच्या सेंट लिईस मिसूरी या बेल्टव्हिले येथील फळशेती व्यवसायात त्यांचे मन गुंतलेले होते. शेतीकडे परत तर जायचे होते, मात्र केवळ शेतीतील उत्पादने विकण्याऐवजी कृषी पर्यटन हा नाविन्यपुर्ण व्यवसाय करायचे ठरवले. त्यांनी एकेर्ट अॅग्रीमार्केटिंग या नावाचे कृषी पर्यटन केंद्राची स्थापना केली. त्या दृष्टीने त्यांनी आपल्या शेतामध्येच छोटेसे स्टोअर चालून करून विविध पिकांचे, फळाचे,  मांस, वाईन, बेकरी, दुध यांच्या विक्रिला सुरवात केली. त्यात लोणची, बकव्हीटचे केक बनवण्यासाठी तयार पिठे यांचे उत्पादन व विक्री सुरू केली. त्यांच्याकडे असलेल्या या पदार्थांच्या ताजेपणामुळे, दर्जेदारपणामुळे त्यांच्या शेतास भेट देणाऱ्या पर्यटकांची संख्या वाढत गेली. पुढे जाऊन त्यांच्याकडे येणाऱ्या पर्यटकांच्या सोयीसाठी 320 खुर्च्यांचे रेस्टॉरंटही सुरू केले. 2001 मध्ये सुरू केलेल्या या कृषि पर्यटन केंद्रास भेट देणाऱ्या पर्यटकांची प्रती वर्ष 5 लाख असून हा सर्व व्याप त्या कुटूंबातील अन्य पाच सदस्यांच्या साह्याने चालवतात. आज जेन एकेर्ट या कृषि पर्यटन या विषयामध्ये नावाजलेल्या सल्लागार असून त्या निमित्ताने त्या जगभर मार्गदर्शन करत असतात.

कृषि पर्यटनाच्या वाढीसाठी...
-वर्षाभरामध्ये कृषि पर्यटनाचे विविध कार्यक्रमही त्या राबवतात. या कृषि पर्यन केंद्राची जाहीरात करण्यासाठी,  कार्यक्रमाची माहीती ग्राहकापर्यंत पोचवण्यासाठी त्यांनी त्यांच्या फार्मची वेबसाईटही तयार केली आहे. त्यातून 24 बाय7 याकालावधीत त्यांच्या कार्यक्रमाचे नियोजन आणि महत्त्वाची माहिती सादर केली जाते.

-  केवळ स्वतःची वेबसाईट करून जेन थांबल्या नाहीत, तर त्यांनी अन्य कृषि व्यावसायिकांना वेबसाईट बनवून देण्याचाही व्यवसाय सुरू केला आहे. त्या आज अनेक त्यांच्या व्यवसायाच्या वेबसाईट डिझाईन करून देतात.

- जेन यांनी कृषि पर्यटनावर सहा पुस्तके लिहिली आहेत. विविध लघुपट विकसित केले असून त्या माध्यमातून कृषि पर्यटन व्यवसायाचा विकास करण्यात येत आहे.

- सध्या त्या कृषि पर्यटन केंद्राच्या माहितीचा एकत्रित कोश तयार करण्याचे काम सुरू केले आहे. त्यातून शेतकऱ्यांना त्याच्या कृषि पर्यटन केंद्राची जाहीरत होणार असून, ग्राहक मिळवण्यात मदत होणार आहे. कृषि पर्यटनाची ही एक प्रकारे बॅंकच तयार होणार आहे.

- 2008 साली जेन यांना हॉल ऑफ फेम या पुरस्कार मिळाला आहे.